AZALOREA
Ona da bihotz-hodietako
gaitzak prebenitzeko, tentsio arteriala jaisten laguntzen du,
kolesterola urritzen laguntzen du. Zenbait minbizi mota prebenitzen
dituzte, muki mintza duten organoetako minbiziaren
prebentziorako(urdailekoa, kolonekoa…), hormonei loturiko minbizien
kontra egiteko( bularrekoa). Haizeak sortzen ditu. Hezurrak ondo
edukitzen laguntzen du. Lurrunetan egosirik hobeto gordetzen ditu azido
folikoa eta C bitamina.
Azalorea Asiakoa da jatorriz, eta Europara XIII.
mende aldera iritsi zen. Hasiera batean sendagai modura erabili zen,
beherakoa eta buruko mina sendatzeko, eta ondoren janari modura
erabiltzen hasi ziren.
Gure artean ohikoena azalore zuria dugun arren, bada erromanesko
izeneko barietate bat, berde kolorekoa. Azalore zuria biribila izan ohi
den bezala, erromaneskoak piramide itxura du. Merkatuan neguan eta
udaberrian aurki dezakegu azalorea.
Ikuspuntu nutritibotik aztertuz gero, gainontzeko barazki guztien
antzera, ur asko du, karbohidratoak % 3, zuntza % 2, proteina apur bat
eta koiperik ez. Proteina gutxi duen arren, purina motakoa denez, azido
uriko hondakinak sorrarazten ditu.
Beraz, ez da gomendagarria
substantzia horrekin arazoak izaten dituzten pertsonentzat. Nutriente
erregulatzailetan oso aberatsa da: C bitamina, azido folikoa eta B1, B2
eta B6 bitaminak ditu.
Gatz mineraletan aipatzekoak dira: potasioa eta fosforoa eta, neurri
txikiagoan bada ere, kaltzioa, burdina eta magnesioa.
Barazki gehienek
bezala, kruziferoek, eta bereziki azaloreak, minbiziaren aurkako
substantzia fitokimikoak dituzte; glukosido sulfuratuak besteak beste.
Azaren familiakoen artean digeritzen errazena dugunez, bereziki
gomendagarria da zenbait egoeratan: urdaileko, giltzurruneko eta
bihotzeko gaixotasunetan batez ere. Zelulosa ugari duenez, hesteetan
haize asko izan ohi duten pertsonei ez zaie komeni azalorea, ezta
behazunean harriak dituztenei ere, azaloreak pisutasuna sor baitezake.
Azaren familiako barazki guztiek bezala, sufre-kopurua dela eta,
usain berezia du egosterakoan. Sukaldean, bada usain hori gutxitzeko
modu bat: egosterakoan patata gehitzea, hain zuzen ere.
Azalorea
prestatzeko modurik egokiena lurrunetan edo labean egitea da. Hala ere,
azalorearen propietate guztiak aprobetxatzeko modurik egokiena gordinik
hartzea da.
Horrela jatea oso zaila denez, hona hemen ausartenentzat
azalorearekin prestaturiko zuku bat; osagaiak hauek lirateke:
- 4 azenario
- azalore-laurdena
- sagar gozo bat
- perrexil-sorta
Lau osagai horietatik azalorea eta perrexila dira C eta B taldeko
bitaminetan aberatsenak. Azenarioak eta sagarrak ere mantenugai ugari
dituzte, baina batez ere zukuari zapore gozoagoa emateko erabiltzen
dira.
Azaloreak dituen propietate guztiak aprobetxatzeaz gain,
estres-egoera nekagarrietan lagungarri izango zaigu zuku hori.
iruzkinik ez:
Argitaratu iruzkina